Kor langt ser ein? Nerdenyheit!

Hei og takk for sist (som ein brukar å sei). Eg er framleis på Ekofisk og det ser ut til at eg skal heim i morgon ( i tilfelle nokon er interessert ;)

Tenkte eg skulle dela ein aldri så liten nerdenyheit! Dvs. det er jo heilt sikkert ein annan nerd som har funne ut av dette før, men likavel...

Kor langt ser ein? Det er det store spørsmålet. Vertfall eit av dei (i tillegg til kvar kjem eg frå? Kvifor er eg til? osv ;) Eg har lurt på dette ein stund og no har eg endelig somla meg til å rekne på det. Har du lurt på det? Når du f.eks. står på riggdekk, 60 m over bakken og ser ein anna rigg i horisonten. Kor langt unna er den? Vel, svaret er ca. 20 km. Eller står på toppen av Ulriken (643 m), då ser ein ca. 64 km. Kan ein då sjå Troll-feltet frå land? Vel, det er 65 km frå land så kanskje.

Følgjande tabell kan dermed memorerast for dei som er sånn passe nerdete av oss:

Høgd over bakken (m) Avstand ein ser (km)

10		8
25		13
50		18
75		22
100		25
200		36
500		56
643		64
1000		80
1586		100
2469		125
8846		226

Viss du er litt på hugget har du kanskje lagt merke til Galdhøgpiggen (2469m), Mount Everest (8848m) og viss du er frå Sykkylven veit du at det høgaste fjellet der heiter Råna (1586m).

Viss du er like nerdete som meg kan du jo spørja: Korleis kan dette reknast ut? Det forblir hemmelig heilt til nokon spør (ein test på om det finst andre som er like nerdete som meg på dette området...:D

Flaks!

Hei igjen alle saman (eller vertfall hei til deg som tilfeldigvis skulle snuble inn på denne sida, no når det er over 4 år sidan eg sist fant på den galskapen det jo er å skriva eit blogginnlegg frå mitt meir eller mindre middels uintressante liv...)!

Sidan svært mykje har endra seg sidan sist innlegg er det vel forventa at eg skal skriva ein oppdatering, sjølv om eg rekner med at dei opplysningane eg no skriv er kjend for ALLE som finn på å gidda å lesa denne bloggen. Eg no bur på Slettebakken saman med min nydelige kone Sigrun (eg veit ikkje kor heldig eg er...). I tillegg har eg hatt 3 jobbar sidan sist (Data processor i DOF Subsea, høgskolelektor ved HiB og lektor ved Olsvikåsen Vgs). No jobbar eg, for første gong i mitt snart 29 år gamel liv, offshore, som logge-geolog i Halliburton. Eg skriv dette frå ein rigg på Ekofisk-feltet.

Ok. Nok om meg (eg er forresten svært fascinert over at folk kan skriva blogginnlegg etter innlegg om kva dei held på med i livet sitt. Eg vart i sin tid pressa av det som no er ekteparet Hystad til å oppretta ein blogg der eg kunne fortelja om det utruleg fantastisk interessante livet mitt ;).

Så, til det som eg tenkte skulle vera saken. Flaks! (digresjonar er til for å brukast!).

Eg har problem med å tru på at alt i denne store flotte verda, berre er tilfeldigheitar og flaks. Nokre (eller ganske mange) trur at me menneska er eit resultat av ein endelaus rekkje av (ja nettopp det) flaks. Kristen som eg er, var eg innom sida origonorge.no nyleg og fann ein interessant artikkel om den kjende ateisten Richard Dawkins. Han trur nettopp at me menneska er blitt til gjennom ein tilfeldig utvikling over millioner (eller milliardar av år). Tilfeldige endringar skapar nye eigenskapar og til slutt sit me her med fornuft, humor, kjensler, empati, temperament og glede. I tillegg til avanserte sanseapparat som syn og hørsel. Ikkje berre det, men me er i også svært avanserte og velfungerande maskinar.

Å tru at alt dette kan bli til av seg sjølv er å ha ei sterk tru. Det er nemleg, statistisk sett, umogleg. Berre eit lite protein på 100 komponentar (aminosyrar) kan ikkje bli til av seg sjølv. Sannsynet for det er like stort som å finne det same sandkornet i Sahara tre gongar på rad, med bind for auga!

Du må tru det du vil, men det er gode argument for at ein skapar er opphavet til universet: Alle fargane, naturen, himmelen og havet. Det er eit stort kunstverk, laga nettopp av ein stor kunstner. Naturlovane (gravitasjon, elektromagnetisme, kjernekrefter...) kjem frå ein lovgjevar. Ordenen i Universet, frå elektronbanar og periodesystem, til planetbanar og spiralgalaksar er slåande og også eit teikn på at det heile er eit Skaparverk.

Trur du forresten at eit fly, ein bil eller ein datamaskin kan bli til av seg sjølv? Alle veit at det trengs ein intelligent skapar for å laga slike maskinar. Berre ein einskild celle er meir avansert enn ein datamaskin... og det må vel også trenge ein Skapar?

Ja, det er saken som fekk meg til å skriva eit blogginnlegg for første gong på over 4 år. Takk for at du leste det og skriv gjerne ein kommentar, einig eller ikkje. :)




Artikkelen som eg refererar til er denne:

http://www.origonorge.no/files/documents/Tveter_Dawkins.pdf


Elles tilrådar eg også den fantastiske debatten mellom nemnte Dawkins og matematikaren John Lennox (God Delusion Debate) på:

http://www.fixed-point.org/index.php/video/35-full-length/164-the-dawkins-lennox-debate




Helsing Sigurd :)

Påskefeiring på Sunnmøre

(Sykkylven)

Lenge sidan siste post på bloggen no. Det har skjedd mykje i livet mitt siste to månadane, eller to og ein halv sidan siste blog-post (23.jan). Sigrun Risa har blitt ein del av mitt liv. Me blei i lag 29.jan 2007. Elles har eg jobba mykje på masteroppgåva mi som eg fekk 29.jan. Den hanlar om vind og straum. Nok om det (!). No er eg på Sunnmøre og feirer påske med familien hennar. Dei er veldig koselige og me har hatt det godt her. Mykje kaffi, kakar og familie/vener. Har fått ein tur i skibakken og. På slalom i Stranda-trekken for fyrste gong i mitt liv (vertfall skikkelig). Var veldig gøy, men ganske dårleg vær. Har vore ganske så dårleg vær denne påska, men den vart god likevel. I dag er dagan der Jesus stod opp frå dei døde. Halleluja. Pris Herren! :D Han er i himmelen no og ventar i spenning på at borna hans skal koma heim til han. Eg glede meg. Da blir konge!! :)

Vinterbilete frå Bergen!

Det har skjedd noko merkeleg i det siste her i Bergen. Etter langt om lenge og lenger enn
langt med utstoppeleg regnvær var det faktisk ein dag med strålande vær, på Herrens dag, 
sundag 21.jan. På måndag og tysdag snødde det og nå er det ein heilt spesiell vinterstemning her i denne vakre byen.

Eg er veldig glad i Bergen. Nesten heile slekta mi bur her og mamma kjem herfrå. Gjennom heile livet har me vore mykje her, hos besteforeldre, tanter og onkler. No bur mamma også her så det er diverre ikkje så ofte eg kjem meg heim til Austevoll og pappa. Det er heller slik at pappa kjem til bydn og vitjar oss og farmor.

Det er vanskeleg for meg å sjå at det finnast nokon by som er finare enn Bergen. Ta ein titt på bileta og sjå om du er einig. ;)

Sigurd Kalvenes: my life.

Litt om mitt liv. Eg er 24 år (nettopp fylt! 16.12.2006).  Austevolling i eksil i Bergen. Trivs godt med det! Studerar oseanografi ved UiB på 5. året. Ferdig til sommaren. Har akkurat skrive ein oppgåve om fenomenet El Nino.

Dagen i dag blir bra. Pappa kjem til byn og me skal møtast hos farmor på god middag og kaffi (gler meg til den). I kveld blir det Salem-trimmen. Gler meg til det.

Ein viktig hending i mitt liv er at eg for snart 4 år sidan (sundag 2.mars 2004 i 20-tida om kvelden) møtte Jesus og vart kristen. Eg forstod at eg trengte han i livet mitt og i forhold til det evige livet. Tingen er at grunnen til all ondskapen i verda er at me menneske syndar. Me lyger, me tenker først og framt på oss sjølv, me svik kvarandre og gjer vonde ting mot kvarandre og mot Gud. Me gjer heldigvis gode ting og, men det endrar ikkje det faktum at me gjer mykje vondt. Eg opplever vertfall at viss eg målar min omsorg for meg sjølv mot min omsorg for andre, så er eg ganske så sjølvopptatt, og det er heilt fryktelig!

I Bibelen står det at syndens løn er døden (Rom 6,23). Det Gud gjorde var at han ordna det slik at sonen hans (som aldri synda og gjorde noko vondt) døde på eit kors for heile verda sin synd. Dvs at når eg seier ja til Jesus så kan eg koma til himmelen. Jippi!! Tenk ein heil evighet saman med Jesus og Gud og alle andre som seier ja til han!! :D Dette er det desidert viktigaste i livet mitt og eg håpar at så mange som mogleg får augo sine opp for kor fantastisk det er det Jesus gjorde. Det er ikkje vanskeleg å finna meir ut om det! Det er berre å opna Bibelen og lesa f.eks. Markus-evangeliet.

Tingen er: Jo meir oppteken eg blir av Jesus og jo meir glad eg blir i han og lærer meir om han (gjennom bl.a. å lesa i Bibelen) jo mindre blir eg opptatt av meg sjølv og meg meg meg. Det er heilt fantastisk å berre løfta blikket mot himmelen å følgja han og ha han som førebilete. Det finnast verkeleg ingen som er eit betre førebilete enn han.

"For eg skammar meg ikkje over evangeliet. Det er ei Guds kraft til frelse for kvar den som trur." Rom 1,16.

"Her er det ingen skilnad, for alle har synda og manglar Guds herlegdom. Men ufortent og av hans nåde blir dei kjende rettferdige, frikjøpte i Kristus Jesus." Rom 3,23-24.

"Gud sende ikkje Son sin til verda for at han skulle dømma verda, men for at verda skulle bli frelst ved han. Den som trur på han, blir ikkje dømd. Den som ikkje trur, er alt dømd, fordi han ikkje har trudd på namnet til Guds einborne Son." Joh 3,17-18.

Velkomen til Sigurds blogg!

Etter lang tids masing frå Rune H. har eg no endelig laga ein blogg. 
No skal det bli godt å sleppa det. Du har komen til rett nettstad! 
Her finn du alt du kan drøyme om! ;)